Роспотребнадзорӑн Чӑваш Енре управленийӗн пуҫлӑхӗ улшӑннӑ. Ку должноҫе вӑхӑтлӑха Татьяна Гермонова пурнӑҫлать.
Вӑл 2021 ҫулхи чӳк уйӑхӗнченпе ертӳҫӗ ҫумӗ пулнӑ. Халӗ вӑл Надежда Луговская кайнӑ хыҫҫӑн ертӳҫӗ тивӗҫӗсене вӑхӑтлӑха хӑйӗн ҫине илнӗ.
Надежда Луговская кӑҫал 65 ҫул тултарнӑ. «Чеб.ру» портал пӗлтернӗ тӑрӑх, вӑл патшалӑх службинчен каймасть, Мускав облаҫне ӗҫлеме куҫать. Вӑл Роспотребнадзорӑн Чӑваш Енри управленине 2011 ҫултанпа ертсе пынӑ.
Чӑваш Енӗн вӗренӳ министрӗн пӗрремӗш ҫумне Максим Гришина ӗҫрен кӑларнӑ.
Республикӑн влаҫ органӗсен официаллӑ порталӗнче вырнаҫтарнӑ документа республикӑн Министрсен Кабинечӗн председателӗн тивӗҫӗсене пурнӑҫлакан Михаил Ноздряков алӑ пуснӑ.
Максим Гришин ку должноҫре пӗлтӗрхи авӑн уйӑхӗнче ӗҫлеме пуҫланӑ. Унччен вӑл Мари Элти Информаци технологийӗсемпе вӗренӳ пахалӑхне хаклакан центра ертсе пынӑ.
Куславккари юсанмалли 5-мӗш колонире (вӑл — хӗрарӑмсен пӗтӗмӗшле режимлӑ колонийӗ, унта 906 ҫынлӑх вырӑн пур) ҫӗнӗ пуҫлӑх ӗҫлеме тытӑннӑ. Ку пукана шалти службӑн подполковникне Павел Кирюхина шанса панӑ.
52 ҫулти Павел Анатольевич 1993-2011 ҫулсенче Раҫҫейӗн Хӗҫпӑшаллӑ вӑйӗсенче тӑрӑшнӑ. 2011 ҫулти ака уйӑхӗнче Федерацин айӑплава пурнӑҫа кӗртекен службинче тӑрӑшма пуҫланӑ.
Етӗрне районӗнчи Пӗрҫырлан ялӗнчи Юрий Илюшкин Камчаткӑра апат пӗҫерет. Чӑваш арҫынни «Берингия Авача» ӑмӑртура шеф-поварта ӗҫлет иккен. Телеграмри «Пуринчен малтан» каналта хыпарланӑ тӑрӑх, вӑл унта хутшӑнакансен тата каюрсен апатланӑвӗшӗн яваплӑ, унӑн команди вӗсене тутлӑхлӑ апат ҫитерет. Юрий Илюшкин шаркку, борщ та пӗҫерет.
ЧР промышленноҫ министрӗн малашне ҫӗнӗ пӗрремӗш ҫум пулӗ. Ку пукана Александр Смирнов йышӑннӑ. Вӑл ку сферӑра 20 ҫула яхӑн ӗҫлет.
Александр Сергеевич инженерта ӗҫленӗ, техника пайӗн ертӳҫи пулнӑ. 2025 ҫулта вара «Ертӳҫӗсен команди» конкурс ҫӗнтерӳҫи пулса тӑнӑ. Ҫав вӑхӑтра вӑл «ФортДиалог» проектсен ертӳҫи пулнӑ.
Аса илтерер: унчченхи пӗрремӗш ҫума Евгений Теллина кӑрлачӑн 23-мӗшӗнче должноҫрен кӑларнӑ.
ЧР Элтеперӗн Олег Николаевӑн пресс-секретарӗ пулнӑ Борис Краснов Киров облаҫӗнче ӗҫлеме тытӑннӑ. Вӑл унта та ҫав должноҫех йышӑннӑ.
Аса илтеретпӗр: Олег Николаев ӑна 2025 ҫулхи кӑрлачӑн 31-мӗшӗнчен ӗҫрен кӑларнӑ. Шӑп ҫав кун Элтепер Патшалӑх Канашне Ҫырупа тухнӑ.
Борис Краснов пресс-секретарьте 2021 ҫулхи ҫу уйӑхӗнченпе ӗҫленӗ. Унтан кайсан вӑл И.Я.Яковлев ячӗллӗ ЧППУра студентсене вӗрентнӗ, «Воин» ҫарпа спорт хатӗрленӗвӗн тата патриотлӑх воспитанийӗн центрне ертсе пынӑ. Халӗ вара Киров облаҫӗн кӗпӗрнаттӑрӗн — пресс-секретарӗ.
Чӑваш Енре ҫӗнӗ вице-премьер пулӗ. Вӑл – Олег Николин. Хушӑва ЧР Элтеперӗ паян алӑ пуснӑ.
Олег Николин – Сӗнтӗрвӑрри хулинчен, вӑл унта 1973 ҫулта ҫуралнӑ. И.Н.Ульянов ячӗллӗ ЧПУран экономиста вӗренсе тухнӑ. Карьерине РФ ШӖМӗн шалти ӗҫсен органӗсенче пуҫланӑ. Карьерин пысӑк пайӗ, 25 ҫул, Перекет банкӗпе ҫыхӑннӑ. 2021 ҫулта Олег Валентинович Чӑваш Республикин Элтеперӗн Тав хутне тивӗҫнӗ. Вӑл авланнӑ, мӑшӑрӗпе икӗ хӗр ӳстереҫҫӗ.
Малтанлӑха палӑртнӑ тӑрӑх, ҫӗнӗ вице-премьер экономикӑпа тата финанссемпе ҫыхӑннӑ ыйтусем тӗлӗшпе ӗҫлӗ.
ЧР ял хуҫалӑх министрӗн ҫумне Ленар Балтаева ӗҫрен кӑларнӑ. Хушӑва Сергей Артамонов премьер-министр алӑ пуснӑ.
Ку дожноҫре вӑл пӗлтӗрхи ака уйӑхӗнченпе ӗҫленӗ. Унччен Мари Элте патшалӑх службин тытӑмӗнче вӑй хунӑ.
Халӗ ял хуҫалӑх министрӗн Андрей Макушевӑн икӗ ҫум юлнӑ: Инна Волкова тата Ольга Кудрявцева.
ЧР промышленноҫ министрӗн ҫумӗ Евгений Теллин ӗҫрен кайнӑ. Хушӑва Сергей Артамонов премьер-министр алӑ пуснӑ.
Вӑл ку должноҫре ҫур ҫул ытла кӑна ӗҫленӗ – пӗлтӗр ҫӗртмен 6-мӗшӗнче министр ҫумӗ пулса тӑнӑ. Унччен «Чӑваш Республикинчи промышленноҫ тата инвестици ӗҫӗн аталанӑвӗн фончӗн» ертӳҫи пулнӑ. «Чеб.ру» пӗлтернӗ тӑрӑх, вӑл ҫав должноҫех таврӑнма пултарать.
Халӗ промышленноҫ министрӗн Марат Якушевӑн пӗр ҫум юлнӑ: Дмитрий Гринев.
Президент пепкелӗх центрне урӑх ҫын ертсе пыма тытӑннӑ. Ку должноҫе раштав уйӑхӗнче Эльвира Васильева йышӑннӑ.
Вӑл 1989 ҫулта И.Н.Ульянов ячӗллӗ ЧПУн медицина факультетне «Сиплев ӗҫӗ» специальноҫпе пӗтернӗ. Диплом илсенех Шупашкарти Ҫурҫӗр клиникинче акушер-гинекологра ӗҫлеме пуҫланӑ. 2008 ҫултанпа вара ача ҫуратмалли 5-мӗш ҫурт заведющийӗ пулнӑ. Вӑл – медицина ӑслӑлӑхӗсен кандидачӗ, Чӑваш Республикин тава тивӗҫлӗ тухтӑрӗ.
Палӑртмалла: унччен Президент пепкелӗх центрне Мускавран килнӗ Евгений Дубнер ертсе пынӑ.
+19.5 °C